Avokati i ish-ministrit Ilir Beqaj ka reaguar sërish në lidhje me standardin e GJKKO-së gjatë procesit të Beqajt. Në një tjetër reagim në rrjetet sociale avokati Ermal Yzeiraj, duke publikuar qëndrimin e ish-ministrit, ai shprehet se kërkesa e Beqajt për të ndjekur procesin penal nga salla e gjyqit, pranë avokatit dhe jo në kafazin e qelqtë, ka marrë tre vendime të ndryshme nga trupa të ndryshme gjykuese.
Sipas tij, një trupë me tre gjyqtarë ka urdhëruar sjelljen e tij në sallë nga toga e shoqërimit, një gjyqtar tjetër i ka kërkuar Drejtorisë së Përgjithshme të Burgjeve të vlerësojë rrezikshmërinë në rastin konkret, ndërsa një trupë e tretë në Apel ka rrëzuar kërkesën e tij.
“Për të njëjtën kërkesë janë marrë tre vendime të ndryshme. Nuk kemi thjesht drejtësi të pavarur, por drejtësi të çoroditur”, thuhet në deklaratën e tij.
Ai thekson se kjo situatë ka krijuar një paqartësi të plotë procedurale, duke e quajtur këtë një “trilemë gjyqësore”.
Në këto kushte, Beqaj ironizon duke deklaruar se në seancën e ardhshme avokati i tij do të kërkojë që edhe mbrojtja të qëndrojë brenda kafazit të qelqtë, nëse nuk ndryshon mënyra e trajtimit të tij gjatë procesit.
Postimi i plotë
Në cilësinë e avokatit të Z. Ilir Beqaj dhe me porosi të tij, më poshtë deklarata e tij publike:
Dilema që u bë trilemë
Të dielën e kaluar komunikova me ju lidhur me një qëndrim kontradiktor të dy trupave të ndryshme të GJKKO-së për kërkesën time që procesin penal ndaj meje ta ndjek në sallë, pranë avokatit tim, dhe jo në kafazin e qelqtë.
Por të premten, më 5 qershor 2026, e njëjta kërkesë, e paraqitur para një trupe të GJKKO-së së Apelit, mori një përgjigje refuzuese, madje të ndryshme edhe nga dy vendimmarrjet e mëparshme.
Kështu, më 5 qershor, dilema se si do t’i ndjek proceset penale ndaj meje u bë trilemë.
Për mua, si i njëjti person, për të njëjtën kërkesë, janë marrë tre vendime të ndryshme:
* një trupë gjykuese, e përbërë nga tre gjyqtarë, ka urdhëruar togën e shoqërimit të më sjellë në sallë;
* një trupë tjetër gjykuese, me një gjyqtar, i ka kërkuar Drejtorisë së Përgjithshme të Burgjeve të vlerësojë rrezikshmërinë në rastin konkret;
* një trupë e tretë, me një gjyqtar në apel, e ka rrëzuar kërkesën.
Tre vendime të ndryshme nga tre trupa të ndryshme gjykuese nuk janë, në vetvete, diçka befasuese. Secila trupë gjykuese është e pavarur në vendimmarrjen e saj. Kjo është një arritje e drejtësisë së pavarur.
Vetëm se, në këtë rast, nuk kemi thjesht drejtësi të pavarur. Kemi drejtësi të çoroditur.
Ndërkohë, më 4 qershor 2026, Komiteti Shqiptar i Helsinkit u është drejtuar me shkresë, lidhur me kërkesën time për të qëndruar në sallë, si edhe për kërkesa të ngjashme të zotërinjve Ilir Meta dhe Erion Veliaj:
* zotit Erjon Bani, kryetar i GJKKO-së;
* zotit Ilir Rusi, kryetar i KLGJ-së;
* zotit Toni Gogu, ministër i Drejtësisë.
Përmbajtja e kësaj letre është bashkëngjitur.
Përballë trilemës së krijuar nga drejtësia e pavarur, në seancën më të parë të ardhshme, mbetet vetëm që avokati im t’i kërkojë gjykatës që gjatë seancës edhe ai të qëndrojë me mua brenda kafazit të qelqtë. (A2 Televizion)
A2 CNN Livestream
MUND TE LEXONI GJITHASHTU
