Kreu 12 vjedhje monopatinash në Tiranë, arrestohet 30-vjeçari

Nga A2 CNN
15 Maj 2024, 12:52 | Kronikë


Një 30-vjeçar me inicialet F. D. (B.)., është arrestuar në flagrancë duke vjedhur një monopatinë, në rrugën "Perlat Rexhepi" në Tiranë. Ai akuzohet dhe për vjedhjen e 11 monopatinave të tjera gjatë periudhës mars-maj 2024. Po ashtu janë proceduar në gjendje të lirë dhe dy persona të tjerë, pasi akuzohen se kanë përvetësuar monopatinat e vjedhura.

“Tiranë, komisariati i Policisë Nr. 2, në vijim të punës për goditjen e paligjshmërive në fushën e vjedhjes së pasurisë, organizoi dhe finalizoi operacionin policor të koduar “Monopati 2”. Dokumentohen me prova ligjore 12 vjedhje të kryera në zona të ndryshme të Tiranës. Gjatë operacionit u arrestua shtetasi F. D. (B.)., 30 vjeç, dhe u proceduan në gjendje të lirë shtetasit A. K., 20 vjeç, dhe J. F., 19 vjeç, të tre banues në Tiranë.

Shtetasi F. D., është kapur në flagrancë duke vjedhur një monopatinë, në rrugën "Perlat Rexhepi" dhe gjatë kontrollit fizik shërbimet e Policisë, i gjetën dhe sekuestruan sasi lënde narkotike kokainë. Nga hetimet e kryera dyshohet se ky shtetas është autor i 11 vjedhjeve të monopatinave, të kryera gjatë periudhës mars-maj 2024, ndërsa shtetasit A. K., dhe J. F., kanë përvetësuar monopatinat e vjedhura.

Në vijim të veprimeve, gjatë kontrollit të banesës së shtetasit F. D., shërbimet e Policisë gjetën dhe sekuestruan, në cilësinë e provës materiale, dy monopatina të dyshuara të vjedhura. Materialet i kaluan Prokurorisë”, thuhet në njoftimin e Policisë së Tiranës.

A2 CNN Livestream

Ditari nga Denisa Pasholli