7 orë debate pa produkt, prapaskenat e mbledhjes së komisionit hetimor

Nga Anesti Barjamemaj
16 Maj 2024, 12:37 | Politikë

U duk se atë që nuk po e bënte dot Komisioni hetimor për kontratat koncensionare në shëndetësi, po nis ta bëjë hetimori tjetër, ai për të dhënat e sistemit TIMS. Plani i punës është miratuar, ishte konfirmuar edhe seanca me dëshmitarët e parë.

Nga ministri i Brendshëm, Taulant Balla, deri tek ish-shefi i IT që po hetohet edhe nga SPAK, për ndodhinë e afro një viti më parë. Pritej një mbledhje maratonë dëshmish. Orë të tëra u konsumuan, por pa produkt. Që skenari do ishte ndryshe nga normalja u pa qartë që në fillim. Kërkesa e dorëzuar nga dëshmitari i parë, ministri i Brendshëm, Taulant Balla, për të folur pa praninë e medias, futi komisionit në debat procedural që zgjati gati 7 orë.

Nga salla e mbledhjes, Salianji kërkoi disa herë praninë e Ballës. Ministri i Brendshëm kishte ardhur në korridoret e Kuvendit, kreu demokrat i hetimorit nisi t’i japë mbledhjes edhe ngjyra show, duke luajtur edhe me frazën policore të shpalljes në kërkim.

Ndërprerjen e mbledhjes si Salianji dhe socialisti Toni Gogue, shfrytëzuan për të zhvendosur arenën e akuzave në korridore.

Ky moment shënoi dhe largimin e socialistëve nga mbledhja, ndërsa demokratët u kthyen të vetëm për të marrë në pyetje drejtorin e Policisë së Shtetit, Muhamet Rrumbullakun. Por numri një i policisë tha pak para deputetëve. Me ikjen e mazhorancës komisioni mbeti pa kuorum dhe informacionet që ai dispononte ishin sekret. Kyçja e gojës së numrit një të policisë, detyroi Salianjin që të ndërpriste sërish mbledhjen.

Edhe dëshmitari i fundit, Ervin Muça, ish-drejtori i IT në Policinë e Shtetit nuk preferoi të fliste para komisionit, por kërkoi që rrëfimi i tij të bëhej në një moment të dytë. Teksa po afrohej mesnata dhe lodhja vihej re tek anëtarët opozitarë të komisionit, u njoftua mbyllja e mbledhjes. Salianji sqaroi vendimmarrjen dhe akuzoi mazhorancën për tentativë për të bllokuar hetimin.

Salianji do pyetet më 28 maj, mazhoranca bëri gjithçka për të bllokuar komisionin.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Erion Dushi