“Duhet të lirohem”, Beleri: Nuk kam qëllim të dëmtoj integrimin e Shqipërisë

Nga Erjon Dervishi
12 Qershor 2024, 23:08 | Politikë

“As unë, as Greqia nuk e kemi si qëllim dëmtimin e interesave të Shqipërisë dhe perspektivën e saj europiane”. Kështu është shprehur Fredi Beleri, i sapozgjedhur eurodeputet, kryebashkiak po ashtu i zgjedhur i Himarës, por i dënuar në shkallën e parë me dy vite burg me akuzën e blerjes së votave.

Në një intervistë telefonike nga burgu për Reuters, Fredi Beleri kërkon lirimin e tij, duke e konsideruar vendimin të padrejtë: “As unë dhe besoj as qeveria greke nuk kemi asnjë qëllim të dëmtojmë pranimin e ndonjë vendi. Por, një Shqipëri që është anëtare e BE-së, por që nuk respekton shtetin e së drejtës dhe vullnetin e popullit nuk i përket familjes europiane. Nuk ka njeri që do që Shqipëria të jetë një vend normal europian më shumë se unë. Ata që më akuzojnë për përçarje, duhet të kërkojnë përgjigjen te populli i Himarës dhe populli grek”.

Beleri, i arrestuar vetëm pak ditë para zgjedhjeve vendore të 2023-shit, pritet të dalë në Gjykatën e Apelit të premten, ku ka ankimuar vendimin e dënimit për korrupsion zgjedhor. Ai vazhdon t’i cilësojë veprimet e drejtësisë ndaj tij të motivuara nga politika: “Vendimi i vetëm i drejtë do të ishte lirimi im. Nuk ka asnjë provë kundër meje. Nuk ka mundësi që vendimi të jetë ndryshe në ndonjë shtet tjetër. Shqipëria nuk mund të sillet si një vend joeuropian”. 

Rasti i Belerit ka acaruar marrëdhëniet midis Shqipërisë dhe Greqisë, fqinjëve ballkanikë, lidhjet e të cilëve shpesh janë acaruar për shkak të dallimeve kulturore dhe historike, si dhe emigrantëve të shumtë shqiptarë në Greqi dhe minoritetit grek në Shqipëri. Pasi Beleri u burgos vitin e kaluar, Greqia kërkoi lirimin e tij të menjëhershëm dhe lejimin e tij të betohej si kryebashkiak, duke paralajmëruar se kjo mund të ndikojë në rrugën e integrimit të Shqipërisë në BE.

Sipas qeverisë Mitsotakis, Shqipëria duhet të respektojë të drejtat e një kryebashkiaku të zgjedhur dhe se aderimi i saj në BE varet nga respektimi i shtetit të së drejtës.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Denisa Pasholli 2024