Sondazh: Preferoni që emri i fëmijës tuaj të jetë:
  • Tradicional 42%
  • Modern 8%
  • I trashëguar 8%
  • Unik 42%

Gjykata e Lartë urdhëron SPAK të hetojë 21 janarin, Rama: Shpresa u rikthye, kontribut i PS që shembi drejtësinë e vjetër

Nga A2 CNN
12 Mars 2024, 18:26 | Politikë



Meritën e vendimit të Gjykatës së Lartë që urdhëron SPAK të hetojë dosjen e 21 janarit, kryeministri Edi Rama ia atribuon Partisë Socialiste. Për kreun e qeverisë, kjo forcë politike e drejtuar prej tij arriti që të zhdukë drejtësinë e vjetër dhe të kontribuojë në një drejtësi të re, e cila merr përsipër edhe hetimin e një krimi shtetëror.

Rama ka edhe një mesazh për të gjithë ata që e kanë derdhur një lumë akuzash në drejtim të tij, por edhe të PS-së.

“Vendimi i Gjykatës së Lartë sot për kthimin në jetë të dosjes së përgjakur të 21 janarit, ka kthyer në jetë shpresën e varrosur në mendjen e shumë shqiptarëve, se ajo dosje e një krimi të egër shtetëror do të dilte më nga varri i drejtësisë së kalbur shqiptare! Ky vendim i ka rihapur rrugën e mbyllur kaq shumë vite, syrit së drejtësisë mbi vendin dhe autorët e atij krimi, duke e kthyer vendimin e qartë të Gjykatës Europiane të të drejtave të Njeriut në një mundësi konkrete për drejtësinë e re, që të bëjë histori me vendosjen e një drejtësie të drejtë. Sot jam më krenar se asnjëherë deri më tash për kontributin unik që Partia Socialiste dha në shembjen e Pallatit të Vjetër të Drejtësisë përmes Reformës në Drejtësi; për durimin në ballafaqimin e vështirë me mllefin legjitim të shumë të zhgënjyerve nga zvarritja e pafundme deri në varrosje e kësaj çështjeje; për moslëkundjen e bindjes se drejtësinë për 21 janarin mund, duhet e do ta bëjë vetëm drejtësia dhe askush tjetër, sado që ajo të vonojë. Me frymëmarrjen e lehtësuar nga vendimi i sotëm dhe vetëdijen se rruga drejt shpagimit përfundimtar nga drejtësia e gjakut të pafajshëm të katër dëshmorëve të 21 janarit është ende e përpjetë, dua t’u them të gjithë atyre që në këto vite të gjata nuk i kanë kursyer fjalët e hidhura në drejtimin tim e të PS: Keni të gjithë mirëkuptimin tim, po kurrë mos e humbni besimin tek forca jonë e përbashkët dhe Shqipëria që po bëjmë me përpjekjen tonë të përbashkët”, shkruan Rama.

Ky reagim vjen pasi sot Gjykata e Lartë vendosi që të ndryshojë vendimin e Apelit të Gjykatës së Posaçme dhe t’ia kalojë SPAK-ut regjistrimin e procedimit penal për "21 Janarin". Kështu, SPAK detyrohet kështu të regjistrojë dhe të hetojë kallëzimin e bërë nga Rajmonda Nika, ndaj Sali Berishës, Lulzim Bashës, Ndrea Prendit dhe Agim Llupos, sipas të cilit ata konsiderohen përgjegjës për vrasjen e Aleks Nikës më 21 janar 2011, në protestën e opozitës para kryeministrisë.

A2 CNN Livestream

Ditari nga Denisa Pasholli