“E kam jetë të dytë”, Salvator Kaçi rrëfen atentatin ndaj tij: Më prenë rrugën dy makina pa targa, dolën njerëz të armatosur!

Nga A2 CNN
14 Maj 2023, 21:57 | Politikë
“E kam jetë të dytë”, Salvator Kaçi

Sali Berisha ka dalë mbrëmjen e sotme në një deklaratë për mediat ku ka folur në lidhje me atentatin që i është bërë ish-kreut të Bashkisë së Shëngjinit, Salvator Kaçit.

Sipas Berishës, persona të armatosur i zunë rrugën Kaçes dhe tentuan që të qëllonin me armë. Ai akuzoi kryeministrin Rama dhe kryebashkiakun Ndreu si të përfshirë në këtë akt.

Ndërkohë, në lidhje me këtë atentat të dështuar, ka folur edhe vetë “shënjestra”, Salvator Kaçi, i cili u shpreh se i është prerë rruga nga dy makina pa targa, nga ku dolën njerëz të armatosur.

Por, sipas Kaçit, falë reagimit të shpejtë të shoqëruesit të tij, ata arritën të shpëtojnë mrekullisht duke u larguar me shpejtësi.

"Kemi shpëtuar falë Zotit dhe manovrave të shoferit tim që është një ish-shofer garde i sprovuar. Kemi shpëtuar dhe Zoti na ka dhënë një jetë të dytë. Të gjitha përpjekjet e Edi Ramës do dështojnë dhe rezultati në Lezhë do jetë 3 me 0.

Kjo gjë nuk ka ndodhur as në vendet e Afrikës së Jugut, që ka ndodhur në Lezhë. Në çdo derë, në çdo biznes ka pasur kërcënime nga banditët e Pjerin Ndreut, i cili është organizator bashkë me Edi Ramën.

Sepse Edi Rama është marrë personalisht me mua, ndërsa unë jam krenar për mbështetjen që i kam dhënë Pashk Gjonit. Nuk e kam parë veten në jetën time në një pozicion kaq të vështirë, përpara armës.

Ata janë njerëz të papërgjegjshëm dhe kriminelë dhe duan ta marrin pushtetin me banda dhe kriminelë. Nuk merret pushteti me banda dhe kriminale. Siç ju thashë, do jetë një rezultat spektakolar në qarkun e Lezhës.”, u shpreh në fjalën e tij Salvator Kaçi.

https://a2news.com/2023/05/14/terror-dhe-dhune-ne-fushate-berisha-tentuan-te-eliminonin-salvador-kacen/

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Denisa Pasholli