Beteja e ish-kryeministrit, Sali Berisha, për liri është zhvendosur sërish në Gjykatën e Lartë. Kjo gjykatë ka regjistruar rekursin e bërë nga ish-kryeministri nën hetim nga SPAK për “korrupsion” kundër masës “arrest në shtëpi”, caktuar nga Gjykata e Posaçme dhe konfirmuar nga Apeli.
Lideri demokrat qëndron në këtë masë prej 30 dhjetorit të vitit të kaluar, kur gjyqtarja Irena Gjoka vendosi të ashpërsojë në izolim shtëpiak, masat e mëhershme “detyrim për paraqitje” e “ndalim të daljes jashtë shtetit”.
Kërkesa e radhës gjyqësore e Berishës për të dalë nga brendia e banesës në rrugën “Mustafa Matohiti” është regjistruar në Gjykatën e Lartë më 20 mars. Si relator i saj është zgjedhur gjyqtari Sokol Binaj, ndërkohë që ende nuk është caktuar një datë për zhvillimin e seancës së parë.
Kjo kërkesë është përpjekja e dytë e ish-kryeministrit në Gjykatën e Lartë për të rrëzuar masat e sigurisë të dhëna ndaj tij për llogari të hetimit të dosjes “Partizani”.
Më 5 mars një kolegj penal i Gjykatës së Lartë refuzoi kërkesën e Berishës për shuarjen e masës “detyrim për paraqitje” dhe “ndalim të daljes jashtë shtetit”, pranimi i së cilës do të sillte edhe shuarjen e masës “arrest në shtëpi”.
Nga ana tjetër, më 12 mars, Gjykata e Posaçme refuzoi kërkesën e tij për shfuqizim të masës “arrest në shtëpi”, ndërsa më 25 mars, Apeli i Posaçëm do të shqyrtojë ankimin e Berishës kundër vendimit që i refuzoi lejen për të marrë pjesë në seancat plenare të Kuvendit të Republikës. (A2 Televizion)
A2 CNN Livestream
MUND TE LEXONI GJITHASHTU
